أ شنو هو الماركتينغ ؟

#الماركتينغ_بالدارجة

#شنو_هو_الماركتينغ

العديد من الناس يمكن كيعرفو شنو كيعني الماركتنيغ سواء بحكم الدارسة ديالهم لهاد الشعبة او بحكم العمل ديالهم فهاد الضومين، لكن بطبيعة الحال الفهم ديالو كيختلف من شخص لأخر..

الماركتينغ كلمة ولينا كنسمعوها مؤخرا فجميع الحالات وجميع البلايص، كتلقى اشهار تيقوليك شوف الماركتينغ، شي حد داير مشروع ومشييي ليه مزيان تيقوليك شتي الماركتينغ اش كيدير، الزواق ولا الألوان الديزاين، ديما شوف الماركتينغ.

الماركتينغ هو حالة كتطبق علينا وحنا ماعارفينهاش أصلا سواء بغبينا ولا كرهنا، بزاف د الناس قالو فاش كيسمعو كلمة الماركتينغ، كتجيهم انه هو "زوق تبيع" وكاين اللي قال "الكذوب على المستهلك" ووو.. لكن واش هادشي بصح؟

الماركتينغ فتعريفه العلمي هو، القدرة ديال الشركة ولا المقاولة على انها تحدد وتشوف فين كاين النقص عند المستهلك، وملي كتلقى هاد النقص كتحاول تقترح حلول باش يتحيد هاد النقص فمرة وفنفس الوقت تلبي الرغبات والحاجيات ديالهم..، بطبيعة الحال الشركة راها كتلبي الرغبات ديالك اصاحبي ولكن فنفس الوقت راها باغيا تربح تاهيا معاك راه ماشي حيث راك عزيز عليها أوكي ههه..

لذلك أنا كشركة "X" قبل ماغادي نجي نطلق للناس واحد المنتوج فالسوق، خاصني نعرف الناس واش محتاجينو ولا لا، لذلك هنا كنبداو بواحد المرحلة اللي كتسمى دراسة السوق "études de marché" هنا كنمشي نسول المستهلك سواء بشكل مباشر أو غير مباشر وكنحاول نعرف منو أش كيبغي؟ أشنو محتاج؟ شنو الأنواع ديال المنتوجات اللي باغيها؟، فين كيشري أكثر؟، الاثمنة اللي كتناسبو؟ ووو إلخ.. لذلك ملي عرفت اشنو ناقصو عاد كيجي دور الشركة باش كيبدا الإنتاج ديال داك المنتوج..

إذن هذا هو فقط تعريف الماركتينغ بشكل مبسط، المشكل اللي كيوقعو فيه بزاف ديال الناس هو أنه كيسحابليهم الماركتينغ هو البيع وهادشي ماشي صحيح، البيع فقط جزء منو، لأن الماركتينغ كيمر عبر مراحل كثيرة ومهمة قبل مانوصلو للبيع فاللخر وهادشي كامل اللي تكلمنا عليه كيمر بواحد الحاجة اللي كنسميوها Démarche marketing أو Stratégie marketing
هاد الإستراتيجية كتنقسم لعدة مراحل مهمة اللي كتقوم بيها الشركة باش تحط المنتوج ديالها فالسوق، وأي غياب لأحد هاد المراحل كيأدي للفشل ديالو، هاد الديمارش غادي نقدموها ليكم من بعد بشكل مفصل وغادي تكون عبارة عن سلسلات مشروحة بالدارجة وغادي تكون إن شاء الله فالمشاركات المقبلة...

يتبع..